XIII Alcuentros de Músiques Asturianes - Presentación: "Diarios d'una panderetera"

El musicólogu Llorián García y l’artista y editora Alicia Álvarez van acompañar a l’autora na presentación del so llibru, nel que tradición, identidá y autenticidá son conceutos alredor de los que Leticia Baselgas – metá del dúu L-R y una de les pandereteres más importantes del panorama musical n’Asturies- lleva reflexonando de magar yera una neña y que, agora, aborda en forma d’ensayu nestos trepidantes diarios personales escritos per cuasi dos décades.

Con ritmu cinematográficu y la guía d’una documentada brúxula teórica, Baselgas rellata les so primeres esperiencies nun grupu de baille marcaes pola disciplia y l’imaxinariu folclóricu posfranquista; el so posterior desencantu cola música tradicional y el rigorismu etnográficu; y, pa cabu, la so llegada al conceutu de post-folk asturianu como un espaciu de llibertá creativa.

De llectura imprescindible tanto pa quien busca afondar nos símbolos que construyen la idea d’Asturies como pa cualquier persona interesada nos procesos de recuperación y reproducción de la tradición.