XIII Alcuentros de Músiques Asturianes - ¡A baillar! Rollu Folk + Soi Panderetera

Vamos facer una tarde en danza al mou Xixón. Da igual que tengas más o menos ritmu, que pises como’l quirosán del cantar a la to pareya, lo importante ye  baillar y pasalo bien. Esperámosvos.

Rollu folk (20.00h): Xurdió de delles sesiones y xuntances d'amigos y amigues y presenta temes de la tradición asturiana y otros d'Europa Atlántica, nuna propuesta qu'invita a la xente a participar y que ta  pensada pal baille, pa cantar o tocar .

Formación:
Carla Gallego: percusión
Raquel Gutiérrez: percusión
Boxib Sen: guitarra
Vítor Xuan Melero: xiblates
Miguel Villar: vigulín

Soi panderetera (21.30 hores): Soi Panderetera ye una iniciativa de les alumnes de la Escuela de Música Tradicional La Quintana de Xixón, que surdió nel añu 2017.

L'actual Asociación musical Soi Panderetera surde nel 2024, como la evolución natural d'esti grupu inicial, una manera de profesionalizase y visibilizar más llargamente'l llabor que  lleva faciendo Raquel Vega Roza dende va años al mandu de les pandereteres qu'agora componen esti grupu.

El grupu surde col envís de facer música'l país pal baille a lo suelto qu’emplegue los códigos y  patrones del baille tradicional asturianu, pero ensin utilizar pa ello les melodíes y cantares populares yá recoyíos y asumíos como propios na nuestra tradición. Apuesten por componer la so  música y escribir les sos propies lletres dende una óptica del sieglu XXI, influyíes poles modes del momentu, pa con ello poder desarrollar un discursu dende la llibertá creativa que les lleve a algamar una sonoridá, estilu y identidá propios.”